Papalapit na nang papalapit ang oras. Gumising! Lahat ng banal! Ipinapahayag Ko ang Aking mga pagbigkas sa inyo, at ang lahat ng nakaririnig sa mga ito ay dapat gumising. Ako ang Diyos na pinanampalatayaan ninyo sa loob ng maraming taon. Ngayon ay nagkatawang-tao Ako at naparito sa inyong harapan, at sa gayon ay ibinubunyag kung sino ang tunay na nagnanais sa Akin, kung sino ang nakahandang magbayad ng anumang halaga para sa Akin, kung sino ang tunay na nakikinig sa Aking salita, at sino ang nakahandang isagawa ang katotohanan. Dahil Ako ang Diyos na makapangyarihan sa lahat—nakikita Ko ang lahat ng lihim ng tao na nakatago sa kadiliman, kilala Ko kung sino ang tunay na nagnanais sa Akin, at kilala Ko kung sino ang lumalaban sa Akin. Sinisiyasat Ko ang lahat ng bagay.

Ngayon ay nais Kong bumuo, sa lalong madaling panahon, ng isang grupo ng mga taong umaayon sa Aking mga layunin, isang grupo ng mga tao na kayang isaalang-alang ang Aking mga pasanin. Gayumpaman, hindi Ko mapigilang linisin at dalisayin ang Aking iglesia; ang iglesia ang puso Ko. Kinamumuhian Ko ang lahat ng masasamang tao na pinipigilan kayo sa pagkain at pag-inom ng Aking salita. Ito ay dahil may ilang tao na hindi Ako tunay na ninanais. Ang mga taong ito ay puno ng panlilinlang, hindi sila lumalapit sa Akin nang may totoong puso nila; masasama sila, at sila ay mga taong hinahadlangan ang pagsasagawa ng Aking kalooban; sila ay mga taong hindi nagsasagawa ng katotohanan. Ang mga taong ito ay puno ng pagmamagaling at kawalang-galang, lubha silang ambisyoso, mahilig silang umaktong superyor, at bagama’t ang mga salitang sinasabi nila ay maganda sa pandinig, lihim nilang hindi isinasagawa ang katotohanan. Ang lahat ng masasamang taong ito ay patatalsikin at itataboy; magdurusa sila sa gitna ng sakuna. Ang mga salitang ito ay upang paalalahanan at balaan kayo na panatilihin ninyong naaayon sa Aking mga layunin ang inyong mga hakbang. Palagi kayong bumalik sa inyong espiritu, dahil minamahal Ko ang mga nagmamahal sa Akin nang kanilang buong puso. Dahil lumalapit kayo sa Akin, pangangalagaan Ko kayo at ilalayo Ko kayo mula sa masasamang iyon; idudulot Ko na kayo ay manindigan sa Aking tahanan, at poprotektahan Ko kayo para marating ninyo ang dulo ng daan.