Ipinatutupad ang Aking salita sa bawat bansa, dako, bayan at denominasyon, at natutupad ito sa bawat sulok sa anumang panahon. Ang mga sakunang nangyayari sa lahat ng dako ay hindi mga labanan sa pagitan ng mga tao, ni mga away na ginagamitan ng mga sandata. Hindi na magkakaroon ng mga digmaan pagkatapos. Lahat ay nasa loob ng Aking pagkakahawak. Lahat ay haharap sa Aking paghatol at manlulupaypay sa gitna ng sakuna. Hayaan ang mga lumalaban sa Akin, pati na ang mga hindi nagkukusang makipagtulungan sa Akin, na magdusa ng pasakit ng iba’t ibang sakuna; hayaan silang manangis at magngalit ang mga ngipin hanggang sa kawalang-hanggan, manatili habambuhay sa kadiliman, at hindi magawang manatiling buhay. Kumikilos Ako nang may katapatan at kaliksihan, at hindi Ko isinasaalang-alang kung gaano ka naging tapat sa Akin sa nakaraan; hangga’t lumalaban ka sa Akin, kaagad na magagalit sa iyo ang Aking kamay ng paghatol, nang walang anumang pagkaantala—ni isang saglit—at nang wala ni katiting na awa. Sinasabi Ko na mula’t sapul pa na Ako ang Diyos na tumutupad sa Kanyang sinasabi. Bawat salitang sinasabi Ko ay matutupad, at ipakikita Ko sa inyo ang bawat isa sa mga ito. Ito talaga ang ibig sabihin ng pagpasok sa realidad sa lahat.

Ang matitinding sakuna ay tiyak na hindi sasapit sa Aking mga anak, na Aking minamahal; aalagaan Ko ang Aking mga anak bawat saglit at bawat sandali. Tiyak na hindi ninyo kakailanganing magtiis ng matinding sakit at pagdurusa. Sa halip, ito ay para gawing perpekto ang Aking mga anak at tuparin ang Aking salita sa mga nagdurusa ng mga sakuna upang maaari ninyong makilala ang Aking pagkakapangyarihan-sa-lahat, lalo pang lumago sa buhay, mas maagang balikatin ang mga pasanin para sa Akin, at italaga ang inyong buong sarili para sa kaganapan ng Aking plano ng pamamahala. Dapat kayong magbunyi nang may saya at ligaya dahil dito. Ipapasa Ko sa inyo ang lahat, na tutulutan kayong mamahala; ilalagay Ko ito sa inyong mga kamay. Kung totoong minamana ng isang anak na lalaki ang buong lupain ng kanyang ama, gaano pa kaya mas katotoo ito sa inyo, Aking mga panganay na anak? Talagang pinagpala kayo. Sa halip na magdusa ng matitinding sakuna, tatamasahin ninyo ang walang-hanggang mga pagpapala. Anong kaluwalhatian! Anong kaluwalhatian!

Bilisan ninyo at sundan ang Aking mga yapak sa lahat ng oras at sa lahat ng dako; huwag kayong mapag-iwanan. Hayaan ninyo ang mga kaisipan ninyo na sumunod sa mga kaisipan Ko, at hayaan ninyo ang mga isip ninyo na sumunod sa isip Ko. Makipagtulungan sa Akin nang may iisang puso at iisang isipan. Kumaing kasama Ko, mamuhay kasama Ko, at masiyahang kasama Ko. Naghihintay ang mga kamangha-manghang pagpapala para matamasa at makuha ninyo. Mayroong lubhang di-matutumbasang kasaganaan sa loob Ko. Wala kahit katiting nito ang naihanda na para sa kaninupamang iba; ginagawa Ko ito lahat-lahat para sa Aking mga anak.

Ngayon, ang nasa isip Ko ang siyang matutupad. Sa sandaling natapos na Akong magsalita sa inyo, ang mga bagay na iyon ay naganap na. Talagang nagpapatuloy ang gawain nang ganoon kabilis at nagbabago ito anumang sandali. Kung ang inyong pansin ay malihis kahit saglit lang, magaganap ang isang “sentripugal” na pangyayari at maitatapon kayo nang napakalayo, at maaalis kung gayon mula sa agos na ito. Kung hindi kayo taimtim na maghahangad, mabibigo kayong tugunan ang Aking masisidhing layunin. Sa hinaharap, dadagsa ang mga tao mula sa iba’t ibang bansa anumang oras: Sa inyong kasalukuyang antas, makakaya ba ninyong pangunahan sila? Lubusan Ko kayong sasanayin na maging mabubuting sundalo sa loob ng maikling panahong ito, nang sa gayon matupad ninyo ang Aking atas. Ninanais Kong luwalhatiin ninyo ang Aking pangalan sa lahat ng aspekto, at magbigay ng kamangha-manghang patotoo para sa Akin. Hayaan ang kanilang mga kinamumuhian na tumindig sa ibabaw nila ngayon upang pangunahan at pamunuan sila. Naaarok ba ninyo ang Aking mga layunin? Napagtanto ba ninyo ang Aking masisidhing layunin? Ginagawa Ko ang lahat ng ito para sa inyo. Nakasalalay lamang ito sa kung kaya ninyong matamasa ang Aking mga pagpapala o hindi.

Ako, ang Diyos na nagmamasid sa pinakaibuturang puso ng tao, ay naglalakbay hanggang sa mga dulo ng mundo. Sinong mangangahas na hindi gumawa ng serbisyo sa Akin? Matindi ang mga alitan sa pagitan ng lahat ng bansa at mapait silang nakikibaka, ngunit sa bandang huli, hindi sila makatatakas mula sa Aking pagkakahawak. Talagang hindi Ko sila pakakawalan nang ganoon kadali. Dadalhin Ko sila isa-isa sa paghatol batay sa kanilang mga pagkilos, mga katayuan sa lupa, at mga kasiyahan sa lupa. Wala Akong paliligtasin. Nagsimula nang mabunyag ang Aking poot at lahat ng ito ay sasapit sa kanila. Lahat ay matutupad sa kanila isa-isa, at lubusan nila itong idinulot sa kanilang mga sarili. Ang mga taong bigong makakilala sa Akin o kinamuhian Ako noong nakaraan ay haharap ngayon sa Aking paghatol. Para naman sa mga umusig sa Aking mga anak, talagang kakastiguhin Ko sila ayon sa mga sinabi at ginawa nila noon. Hindi Ko palalampasin maging ang mga bata. Ang lahat ng taong ito ay kauri ni Satanas. Kahit na wala silang sinasabi o ginagawa, kung namumuhi sila sa Aking mga anak sa kanilang mga puso, hindi Ko paliligtasin ni isa man sa kanila. Ipakikita Ko sa kanilang lahat na tayo—ang grupong ito ng mga tao—ay humahawak ng kapangyarihan ngayon; tiyak na hindi sila. Dahil dito, lalong dapat pa ninyong ilaan ang inyong sukdulang lakas at igugol ang inyong sarili nang taos-puso para sa Akin, upang magluwalhati at magpatotoo kayo sa pangalan Ko sa bawat dako, sulok, relihiyon, at denominasyon, at palaganapin ito sa buong sansinukob at sa mga dulo ng mundo!